ឯកឧត្តមរដ្ឋមន្រ្ដីក្រសួងពាណិជ្ជកម្ម បានទទួលជួបពិភាក្សាការងារជាមួយ ឯកឧត្តមអគ្គលេខាធិការអាស៊ាន តាមប្រព័ន្ធវីដេអូ

ថ្ងៃផ្សព្វផ្សាយ: ថ្ងៃទី០៣ ខែកញ្ញា ឆ្នាំ២០២១ - ប្រភេទព័ត៌មាន: ព័ត៌មានទូទៅ

image

(ភ្នំពេញ)៖ នារសៀលថ្ងៃសុក្រ ទី០៣ ខែកញ្ញា ឆ្នាំ២០២១ នៅទីស្តីការក្រសួងពាណិជ្ជកម្ម ឯកឧត្តម ប៉ាន សូរស័ក្ដិ រដ្ឋមន្រ្ដីក្រសួងពាណិជ្ជកម្ម និងជារដ្ឋមន្រ្តីសេដ្ឋកិច្ចអាស៊ានសម្រាប់កម្ពុជា បានដឹកនាំគណៈប្រតិភូក្រសួងពាណិជ្ជកម្ម ទទួលជួបពិភាក្សាការងារជាមួយ ឯកឧត្តម Lim Jock Hoi អគ្គលេខាធិការអាស៊ាន និងសហការី តាមប្រព័ន្ធវីដេអូ។

ជំនួបពិភាក្សានេះ បានផោ្តតសំខាន់លើវឌ្ឍនភាពនៃដំណើរការផ្តល់សច្ចាប័នកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) រវាងអាស៊ាន និងបណ្តាប្រទេសជាភាគីសមាជិក និងជាពិសេសការត្រៀមខ្លួនរបស់កម្ពុជាក្នុងការរៀបចំទទួលធ្វើជាប្រធានអាស៊ាននៅឆ្នាំ២០២២ និងត្រៀមរៀបចំកិច្ចប្រជុំនានា។

ជាកិច្ចចាប់ផ្តើម ឯកឧត្តមរដ្ឋមន្រ្ដី បានជម្រាបជូនឯកឧត្តមអគ្គលេខាធិការអាស៊ាន អំពីកិច្ចខិតខំប្រឹងប្រែងរបស់រាជរដ្ឋាភិបាលក្នុងការគ្រប់គ្រង់ និងការទប់ស្កាត់ការរីករាលដាលនៃជំងឺកូវីដ-១៩ ជាពិសេស យុទ្ធនាការចាក់វ៉ាក់សាំងជូនប្រជាពលរដ្ឋកម្ពុជា និងជនបរទេសគ្រប់រូប ដែលជាកត្តាសំខាន់សម្រាប់ការ ស្តារទ្បើងវិញនូវសេដ្ឋកិច្ចសង្គម។

ជាមួយគ្នានេះផងដែរ ឯកឧត្តមរដ្ឋមន្រ្ដី បានជម្រាបជូនអំពីវឌ្ឍនភាពក្នុងការរៀបចំការងារសំខាន់ៗ និង ទិសដៅការងារក្នុងការត្រៀមរបស់កម្ពុជាក្នុងនាមជាប្រធានអាស៊ានឆ្នាំ២០២២ ជាពិសេសក្រោមសសរស្តម្ភសហគមន៍សេដ្ឋកិច្ចអាស៊ាន ក្នុងនោះរួមមាន ការចងក្រងនូវឯកសារគន្លឹះ ស្តីពីសមិទ្ធផលអាទិភាពសេដ្ឋកិច្ចសំខាន់ៗ ជាដើម។

ឯកឧត្តមរដ្ឋមន្រ្តីបានបន្ដថា បច្ចុប្បន្នភាពក្នុងដំណើរការផ្តល់សច្ចាប័នលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) សំដៅឱ្យកិច្ចព្រមព្រៀងនេះ ចូលជាធរមាននៅដើមឆ្នាំ២០២២ ផងដែរ ហើយដើម្បីអាចទាញយកផលប្រយោជន៍ពីកិច្ចព្រមព្រៀងនេះ ស្របពេលនឹងការខិតខំស្តារទ្បើងវិញនូវសេដ្ឋកិច្ចសង្គម។

ជាការឆ្លើយតប ឯកឧត្តមអគ្គលេខាធិការអាស៊ាន បានបញ្ជាក់ពីការប្តេជ្ញាចិត្តគាំទ្រយ៉ាងពេញលេញ និងផ្តល់កិច្ចសហប្រតិបត្តិការយ៉ាងជិតស្និទ្ធក្នុងការជួយកម្ពុជាឱ្យទទួលបានជោគជ័យនាពេលដែលកម្ពុជាធ្វើជាប្រធានអាស៊ាន ជាពិសេសក្នុងការរៀបចំកិច្ចប្រជុំថ្នាក់រដ្ឋមន្រ្តីសេដ្ឋកិច្ចអាស៊ាន និងកិច្ចប្រជុំពាក់ព័ន្ធក្រោមសសរស្តម្ភសហគមន៍សេដ្ឋកិច្ចអាស៊ានក្នុងឆ្នាំ២០២២៕

https://s1.moc.gov.kh/mocspace/mocspace_1633181382795.jfif
https://s1.moc.gov.kh/mocspace/mocspace_1633181385461.jfif
https://s1.moc.gov.kh/mocspace/mocspace_1633181385399.jfif
https://s1.moc.gov.kh/mocspace/mocspace_1633181385034.jfif
https://s1.moc.gov.kh/mocspace/mocspace_1633181384771.jfif
https://s1.moc.gov.kh/mocspace/mocspace_1633181384815.jfif
https://s1.moc.gov.kh/mocspace/mocspace_1633181384754.jfif
https://s1.moc.gov.kh/mocspace/mocspace_1633181384920.jfif
https://s1.moc.gov.kh/mocspace/mocspace_1633181382043.jfif
https://s1.moc.gov.kh/mocspace/mocspace_1633181384937.jfif
https://s1.moc.gov.kh/mocspace/mocspace_1633181385075.jfif
https://s1.moc.gov.kh/mocspace/mocspace_1633181385369.jfif
https://s1.moc.gov.kh/mocspace/mocspace_1633181385608.jfif
https://s1.moc.gov.kh/mocspace/mocspace_1633181385469.jfif
https://s1.moc.gov.kh/mocspace/mocspace_1633181385485.jfif