News(ភ្នំពេញ)៖ នាថ្ងៃទី៣ ខែមេសា ឆ្នាំ២០២៦ ក្រសួងពាណិជ្ជកម្មបានសម្រេចចុះបញ្ជីជាផ្លូវការនូវផលិតផលសក្តានុពលចំនួន ៤ មុខបន្ថែមទៀតជា "ម៉ាកសម្គាល់ភូមិសាស្ត្រទំនិញ (Geographical Indication - GI)" ដែលជាជំហានសំខាន់ក្នុងការជំរុញ ព្រមទាំងលើកកម្ពស់កេរ្តិ៍ឈ្មោះនិងអត្តសញ្ញាណផលិតផលខ្មែរលើឆាកអន្តរជាតិ ការពារសិទ្ធិកម្មសិទ្ធិបញ្ញារបស់សហគមន៍ផលិតករ និងបង្កើនសក្តានុពលសម្រាប់ការចុះបញ្ជីនៅទីផ្សារអន្តរជាតិនាពេលអនាគត។ ផលិតផលទាំង ៤ រួមមាន៖ ១. សូត្រមាសភ្នំស្រុក (Phnom Srok Golden Silk)៖ ផលិតផលសិប្បកម្មត្បាញដោយដៃ មានសរសៃសូត្រល្អ ណែន ភ្លឺរលោង និងប្រើពណ៌ធម្មជាតិ ពីដំណើរការផលិតដែលគ្មានសារធាតុគីមី។ ២. ក្តាមថ្មកោះកុង (Koh Kong Mud Crab)៖ ក្តាមទឹកប្រៃពីតំបន់ព្រៃកោងកាង មានសាច់ណែន ស្វិត និងរសជាតិផ្អែមឆ្ងាញ់ពិសេស។ ៣. ស្វាយចន្ទីកំពង់ធំ (Kampong Thom Cashew Nut)៖ គ្រាប់ធំ សាច់ពេញ ស្រួយ ក្លិនឈ្ងុយបានយូរ និងមានរសជាតិឈ្ងុយបែបប៊ឺ ឬទឹកដោះគោ ដែលមានគុណភាពខ្ពស់។ ៤. ស្វាយឧត្តរមានជ័យ (Oddar Meanchey Mango)៖ ស្វាយមានសាច់ណែន ស្រួយ មានទឹកដម និងរសជាតិជូរអែមឆ្ងាញ់ អាចកែច្នៃបានច្រើនប្រភេទ។ ផលិតផលទាំងនេះ ត្រូវបានផលិត និងប្រមូលផលនៅតំបន់ភូមិសាស្ត្រជាក់លាក់ ដែលមានលក្ខខណ្ឌធម្មជាតិ និងបច្ចេកទេសផលិតជាក់លាក់ បង្កើតឱ្យមានអត្តសញ្ញាណ និងគុណភាពពិសេស ហើយមានសក្តានុពលក្នុងការទទួលស្គាល់ និងការពារនៅលើទីផ្សារអន្តរជាតិ។ សូមជម្រាបជូនថា តាមរយៈការចុះបញ្ជីជាម៉ាកសម្គាល់ភូមិសាស្ត្រទំនិញនេះ នឹងនាំមកនូវអត្ថប្រយោជន៍សំខាន់ៗ រួមមាន៖ • ការការពារផ្លូវច្បាប់៖ ទប់ស្កាត់ការក្លែងបន្លំ និងធានាប្រើប្រាស់ឈ្មោះផលិតផលត្រឹមត្រូវតាមតំបន់ភូមិសាស្ត្រ • ថែរក្សាវប្បធម៌ និងប្រពៃណី៖ រក្សាទុកចំណេះដឹង និងវិធីសាស្ត្រផលិតតាមសហគមន៍ • លើកកម្ពស់ទេសចរណ៍ និងបរិស្ថាន៖ ជំរុញទេសចរណ៍តាមតំបន់ផលិត និងគាំពារការផលិតស្របតាមបរិស្ថានធម្មជាតិ • ការបង្កើនតម្លៃទីផ្សារ និងនាំចេញ៖ បង្កើនតម្លៃផលិតផល និងពង្រីកសក្តានុពលប្រកួតប្រជែងលើទីផ្សារអន្តរជាតិ • បង្កើនសក្តានុពលចុះបញ្ជីអន្តរជាតិ៖ ជួយបើកផ្លូវសម្រាប់ការទទួលស្គាល់ GI នៅក្រៅប្រទេស និងការពារផលិតផលខ្មែរ នៅលើទីផ្សារសកល
News(ហូជីមិញ, វៀតណាម)៖ នាថ្ងៃព្រហស្បតិ៍ ទី២៣ ខែមេសា ឆ្នាំ២០២៦ ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារជំរុញការនាំចេញ បន្តធ្វើទស្សនកិច្ចសិក្សានៅក្រុមហ៊ុនកែច្នៃស្វាយចន្ទីដ៏ធំចំនួន២ គឺ ក្រុមហ៊ុន Dan On Foods Corporation និង ក្រុមហ៊ុន Olam Food Ingredients ដែលមានទីតាំងនៅក្នុងទីក្រុងហូជីមិញ ប្រទេសវៀតណាម។ ដំណើរទស្សនកិច្ចសិក្សានេះ គឺជា “បេសកកម្មស្វែងយល់ពីឧស្សាហកម្មស្វាយចន្ទី” នៅប្រទេសវៀតណាម ដែលគាំទ្រដោយគម្រោង EU-German CAPSAFE ក្នុងគោលបំណង ដើម្បីសិក្សាស្វែងយល់ពីឧស្សាហកម្មស្វាយចន្ទី ដំណើរការនៃការផលិត កែច្នៃ បញ្ហាប្រឈម ដំណោះស្រាយ ពាក់ព័ន្ធនឹងវិស័យស្វាយចន្ទី សំដៅលើកកម្ពស់ខែ្សច្រវាក់ផ្គត់ផ្គង់ និងទាញយកតម្លៃបន្ថែម ដោយមានការចូលរួមពីតំណាងអន្តរក្រសួង-ស្ថាប័នពាក់ព័ន្ធ ក្នុងវិស័យស្វាយចន្ទីកម្ពុជា ផងដែរ។ សូមជម្រាបជូនថា កន្លងមក ក្រសួងពាណិជ្ជកម្មកម្ពុជា ក៏បានទទួលជួបពិភាក្សាការងារជាមួយក្រុមហ៊ុន Olam Food Ingredients កាលពីខែមីនា ឆ្នាំ២០២៦ ដើម្បីជំរុញការវិនិយោគទៅលើការកែច្នៃគ្រាប់ស្វាយចន្ទីកម្ពុជា និងជំរុញការនាំចេញផលិតផលស្វាយចន្ទីកម្ពុជា ផងដែរ៕
Newsអបអរសាទរ ទិវាកម្មសិទ្ធិបញ្ញាពិភពលោក ក្រោមមូលបទ "កម្មសិទ្ធិបញ្ញា និងកីឡា” ២៦ មេសា ២០២៦
News(សៀមរាប)៖ នាថ្ងៃសុក្រ ទី២៤ ខែមេសា ឆ្នាំ២០២៦ មន្ទីរពាណិជ្ជកម្មខេត្តសៀមរាប បានរៀបចំពិធីបើក“យុទ្ធនាការផលិតផលជាតិ #MadeInCambodia” នៅសួនហាត់ប្រាណមាត់ស្ទឹងសៀមរាប ដែលដឹកនាំដោយ លោក ភឿន គឹមលី ប្រធានមន្ទីរពាណិជ្ជកម្ម និងមានការចូលរួមពី លោក-លោកស្រី តំណាងមន្ទីរពាក់ព័ន្ធ អាជ្ញាធរមូលដ្ឋាន វិស័យឯកជន ផលិតករ ក្រុមហ៊ុន ផ្សារ ម៉ល ម៉ាត មីនីម៉ាត ជាច្រើនរូប។ “យុទ្ធនាការផលិតផលជាតិ #MadeInCambodia” គឺជាយុទ្ធនាការលើកកម្ពស់ផលិតផលក្នុងស្រុក និងការនាំចេញផលិតផលជាតិនៅនឹងកន្លែង ដើម្បីបង្ហាញពី "ការស្រទ្បាញ់ផលិតផលជាតិ ទឹកចិត្តនៃក្តីស្រទ្បាញ់ចំពោះ កសិករខ្មែរនិងផលិតករខ្មែរ និងស្មារតីស្រទ្បាញ់ជាតិមាតុភូមិរបស់យើង!” ដែលរៀបចំឡើងរយៈពេល ១ សប្តាហ៍ ក្នុង ១ ខែ រយៈពេល ១ ឆ្នាំ ពេញ ក្នុងគោលបំណង៖ បង្ហាញនិងផ្សព្វផ្សាយផលិតផលជាតិ ឱ្យមានភាពលេចធ្លោ ក៏ដូចជាឱកាសជំរុញការដាក់លក់ ផលិតផលក្នុងស្រុក នៅតាមបណ្តាផ្សារទំនើប ម៉ាត មីនីម៉ាតទូទាំងប្រទេស៕ #MOC2026 #យុទ្ធនាការផលិតផលជាតិ #MadeInCambodia
News(ប៊ិញភឿក, វៀតណាម)៖ នាថ្ងៃពុធ ទី២២ ខែមេសា ឆ្នាំ២០២៦ ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារជំរុញការនាំចេញ បានជួបពិភាក្សាការងារជាមួយសមាគមស្វាយចន្ទីខេត្តប៊ិញភឿក និងបានបន្តធ្វើទស្សនកិច្ចសិក្សានៅសិប្បកម្មកែច្នៃគ្រាប់ស្វាយចន្ទីខ្នាតតូច និងមធ្យមមួយចំនួន ក្នុងគោលបំណងដើម្បីសិក្សា និងស្វែងយល់បន្ថែមពីឱកាសសម្រាប់ការទាក់ទាញការវិនិយោគមកកាន់កម្ពុជា និងពិភាក្សាអំពីដំណោះស្រាយបញ្ហាប្រឈម សំដៅលើកកម្ពស់ខែ្សច្រវាក់តម្លៃ និងទាញយកតម្លៃបន្ថែមនៅក្នុងវិស័យស្វាយចន្ទីកម្ពុជា។ សូមជម្រាបជូនថា ជំនួបនេះ គឺជាថ្ងៃទី២ នៃដំណើរទស្សនកិច្ចសិក្សាកម្ពុជាស្តីពី “បេសកកម្មស្វែងយល់ពីឧស្សាហកម្មស្វាយចន្ទី” នៅប្រទេសវៀតណាម ដែលមានការគាំទ្រដោយគម្រោង EU-German CAPSAFE និងមានការចូលរួមពីអន្តរក្រសួង ស្ថាប័នពាក់ព័ន្ធនៅក្នុងវិស័យស្វាយចន្ទីផងដែរ៕