(ស៊ីដនី, អូស្រ្តាលី)៖ នាល្ងាចថ្ងៃចន្ទ ទី១៧ ខែកុម្ភៈ ឆ្នាំ២០២៥ នៅទីក្រុងស៊ីដនី ប្រទេសអូស្ត្រាលី លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បានទទួលទានសាអាហារការងារពេលល្ងាចជាមួយលោកស្រី Robyn Mudie ឧបការីទី១ នៃលេខាធិការទទួលបន្ទុកតំបន់អាស៊ីអាគ្នេយ៍ និងដីគោក នៃក្រសួងការបរទេស និងពាណិជ្ជកម្មអូស្ត្រាលី។ ក្នុងឱកាសនោះ ភាគីទាំងពីរបានពិភាក្សាលើប្រធានបទសំខាន់ៗដូចជា ពាណិជ្ជកម្មទ្វេភាគី ឌីជីថលនីយកម្ម ការកសាងធនធានមនុស្ស អនាគតតំបន់ឥណ្ឌូប៉ាស៊ីហ្វិក សមភាពយេនឌ័រ ដោយក្នុងនោះលោកជំទាវរដ្ឋមន្រ្តី បានលើកទឹកចិត្តឱ្យវិនិយោគិនអូស្រ្តាលីមកវិនិយោគក្នុងសួនឧស្សាហកម្មនៅកម្ពុជាផងដែរ។

បន្ថែមពីលើនេះទៀត ភាគីទាំងពីរក៏បានផ្លាស់ប្តូរយោបល់លើប្រធានបទមួយចំនួនទៀតដូចជា បរិបទពាណិជ្ជកម្មសាកល ការធ្វើពិពិធកម្មទីផ្សារតាមរយៈការទាញយកប្រយោជន៍ពីទីផ្សារអាស៊ាន និងអាសិប ដោយសង្កត់ធ្ងន់លើប្រព័ន្ធពាណិជ្ជកម្មពហុភាគីនិយមដែលផ្អែកលើគោលការណ៍ច្បាប់ដើម្បីកសាងទំនុកចិត្តដល់វិស័យធុរកិច្ច។