News(ភ្នំពេញ)៖ នាព្រឹកថ្ងៃសុក្រ ទី៩ ខែមករា ឆ្នាំ២០២៦ នៅទីស្តីការក្រសួងពាណិជ្ជកម្ម របៀបវារៈទី៦ ក្នុងថ្ងៃទី២ នៃពិធីសន្និបាតបូកសរុបលទ្ធផលការងារពាណិជ្ជកម្ម ឆ្នាំ២០២៥ និងទិសដៅការងារពាណិជ្ជកម្ម ឆ្នាំ២០២៦ របស់ក្រសួងពាណិជ្ជកម្ម បានដាក់សម្ភោធនូវសមិទ្ធផលការងារទំនើបកម្មចំនួន ៤ រួមមាន៖ ១. ការធ្វើសាមញ្ញកម្មនៃការងារចុះបញ្ជីពាណិជ្ជកម្ម ដែលបានការកាត់បន្ថយនីតិវិធី និងឯកសារតម្រូវដើម្បីសម្របសម្រួលដល់ការចុះបញ្ជីពាណិជ្ជកម្ម អោយកាន់តែមានភាពងាយស្រួល ប្រសិទ្ធភាពខ្ពស់ លឿនរហ័ស និងចំណេញពេលវេលា ២. ការធ្វើទំនើបកម្មការទូទាត់កម្រៃសេវាសាធារណៈ ដែលបានបញ្ចូលការទូទាត់សេវាពាណិជ្ជកម្មតាមប្រព័ន្ធអនឡាញ ដូចជាការតម្កល់ប្រតិវេទន៍ប្រចាំឆ្នាំ និងការដាក់ពាក្យស្នើសុំអនុវត្តដីការក្សាការពារ ទៅក្នុង ABA Mini App និង ACLEDA Mini App និងធនាគារផ្សេងៗទៀតក្នុងពេលឆាប់ៗខាងមុខ ៣. ការលើកលែងការផាកពិន័យខកខានតម្កល់ប្រតិវេទន៍ប្រចាំឆ្នាំ ដោយអនុវត្តរាល់ការផាកពិន័យខកខានតម្កល់ប្រតិវេទន៍ប្រចាំឆ្នាំ គិតត្រឹមតែ ១ឆ្នាំចុងក្រោយ ៤. ការសម្ពោធដាក់ឱ្យប្រើប្រាស់ជាផ្លូវការនូវកម្មវិធី MOC Mobile App ដើម្បីជំរុញការធ្វើបរិវត្តកម្មឌីជីថលក្នុងវិស័យពាណិជ្ជកម្ម ផ្តោតលើការជួយសម្រួលអនុវត្តនិងលើកកម្ពស់ប្រសិទ្ធការងាររបស់មន្ត្រីក្រសួងពាណិជ្ជកម្មឱ្យកាន់តែមានភាពប្រសើរជាងមុន៕
News(ភ្នំពេញ)៖ នារសៀលថ្ងៃព្រហស្បតិ៍ ទី៨ ខែមករា ឆ្នាំ២០២៦ នៅទីស្តីការក្រសួងពាណិជ្ជកម្ម ក្នុងរបៀបវារៈទី៥ ក្នុងរសៀលថ្ងៃទី១ នៃពិធីសន្និបាតបូកសរុបលទ្ធផលការងារពាណិជ្ជកម្ម ឆ្នាំ២០២៥ និងទិសដៅការងារពាណិជ្ជកម្ម ឆ្នាំ២០២៦ របស់ក្រសួងពាណិជ្ជកម្ម គឺជាបទអន្តរាគមន៍គន្លឹះ ស្តីពី៖ កំណែទម្រង់រដ្ឋបាលសាធារណៈក្នុងវិស័យពាណិជ្ជកម្ម ដែលបកស្រាយដោយ ឯកឧត្តម កឹម ស៊ីថន រដ្ឋលេខាធិការប្រចាំការក្រសួងពាណិជ្ជកម្ម។ ការងារកែទម្រង់រដ្ឋបាលសាធារណៈនេះ គឺធ្វើឡើងស្របតាមកម្មវិធីនយោបាយ និងយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ក្នុងគោលបំណងកែលម្អ ផ្លាស់ប្ដូររបៀបដឹកនាំ ការគ្រប់គ្រង និងផ្ដល់សេវាសាធារណៈរបស់រដ្ឋ ឱ្យកាន់តែមានប្រសិទ្ធភាព តម្លាភាព ទទួលខុសត្រូវ និងផ្ដោតលើទំនុកចិត្តពីអ្នកប្រើប្រាស់ សំដៅធ្វើឱ្យសេវាសាធារណៈរបស់ក្រសួងពាណិជ្ជក្ម កាន់តែមានងាយស្រួល និងមានគុណភាពខ្ពស់ បង្កើនទំនុកចិត្តរបស់អ្នកប្រើប្រាស់មកលើសេវាសាធារណៈ និងគាំទ្រការអភិវឌ្ឍន៍សេដ្ឋកិច្ច-សង្គម ប្រកបដោយភាពប្រកួតប្រជែង៕
News(ភ្នំពេញ)៖ នារសៀលថ្ងៃព្រហស្បតិ៍ ទី៨ ខែមករា ឆ្នាំ២០២៦ នៅទីស្តីការក្រសួងពាណិជ្ជកម្ម ក្នុងរបៀបវារៈទី៤ ក្នុងរសៀលថ្ងៃទី១ នៃពិធីសន្និបាតបូកសរុបលទ្ធផលការងារពាណិជ្ជកម្ម ឆ្នាំ២០២៥ និងទិសដៅការងារពាណិជ្ជកម្ម ឆ្នាំ២០២៦ របស់ក្រសួងពាណិជ្ជកម្ម គឺជាវេទិកាពិភាក្សាស្ដីពី៖ កំណែទម្រង់រដ្ឋបាលសាធារណៈ និងការធ្វើឌីជីថលូបនីយកម្មក្នុងវិស័យពាណិជ្ជកម្ម ដែលសម្របសម្រួលដោយ ឯកឧត្តម វ៉េង សុធី រដ្ឋលេខាធិការក្រសួងពាណិជ្ជកម្ម និងចូលរួមធ្វើបទបង្ហាញ បកស្រាយ ព្រមទាំងចែករំលែកពីបទពិសោធន៍ដោយផ្ទាល់ពីថ្នាក់ដឹកនាំក្រសួងពាណិជ្ជកម្ម ដែលមានបទពិសោធន៍អនុវត្តការងារជាក់ស្ដែងទៅលើប្រធានបទសំខាន់ៗ រួមមាន៖ ១. ការពង្រឹងអភិបាលកិច្ច និងលើកកម្ពស់ប្រសិទ្ធភាពការងារ បកស្រាយដោយ ឯកឧត្តម ឡាយ សុខសៅគន្ធា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយករដ្ឋបាល និងហិរញ្ញវត្ថុ ២. ការកំណត់គុណវុឌ្ឈមន្ដ្រីឱ្យសមស្របនឹងមុខតំណែង និងរៀបចំផែនកាអភិវឌ្ឍន៍ធនធានមនុស្ស បកស្រាយដោយលោក មាន ចំណាប់ ប្រធាននាយកដ្ឋានបុគ្គលិក ៣. ការធ្វើឌីជីថលូបនីយកម្មក្នុងវិស័យពាណិជ្ជកម្ម (Modernization in Trade) បកស្រាយដោយ លោកជំទាវ ជា រដ្ឋា រដ្ឋលេខាធិការក្រសួងពាណិជ្ជកម្ម ៤. ទំនើបកម្មប្រព័ន្ធស្វ័យប្រវត្តិកម្ម នៃការផ្តល់វិញ្ញាបនបត្របញ្ជាក់ដើមកំណើតទំនិញក្នុងតំបន់សេដ្ឋកិច្ចពិសេស បកស្រាយដោយ ឯកឧត្តម ហូ ស៊ីវយ៉ុង ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកសេវាពាណិជ្ជកម្ម៕
News(ភ្នំពេញ)៖ ក្នុងរបៀបវារៈទី៣ នៃរសៀលថ្ងៃទី១ នៃពិធីសន្និបាតបូកសរុបលទ្ធផលការងារពាណិជ្ជកម្ម ឆ្នាំ២០២៥ និងទិសដៅការងារពាណិជ្ជកម្ម ឆ្នាំ២០២៦ នេះ ក្រសួងពាណិជ្ជកម្ម បានរៀបចំវេទិកាពិភាក្សាស្ដីពី៖ សមាហរណកម្ម និងពិពិធកម្មទីផ្សារអន្តរជាតិ ដែលសម្របសម្រួលដោយ ឯកឧត្តម ពេជ ឫទ្ធី រដ្ឋលេខាធិការក្រសួងពាណិជ្ជកម្ម និងមានការចូលរួមធ្វើបទបង្ហាញ ចែករំលែកពីបទពិសោធន៍លើការអនុវត្តការងារជាក់ ដោយផ្ទាល់ពីថ្នាក់ដឹកនាំក្រសួងពាណិជ្ជកម្ម ទៅលើប្រធានបទសំខាន់ៗជាច្រើន រួមមាន៖ ១. យន្តការនៃការជំរុញការនាំចេញ និងអភិវឌ្ឍន៍ទីផ្សារក្រៅប្រទេស ដោយ ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម ២. សមាហរណកម្ម និងពិពិធកម្មទីផ្សារអន្តរជាតិ បកស្រាយដោយ ឯកឧត្តម ឡុង កែមវិចិត្រ អគ្គនាយកនៃអគ្គនាយកដ្ឋានពាណិជ្ជកម្មអន្តរជាតិ ៣. ការត្រៀមលក្ខណៈដើម្បីរក្សាបាននូវឧត្តមភាពប្រកួតប្រជែង ក្រោយការចាកចេញពីឋានៈប្រទេសអភិវឌ្ឍន៍តិចតួច បកស្រាយដោយ ឯកឧត្តម ទិត សីច័ន្ទលី អគ្គនាយកនៃអគ្គនាយកដ្ឋានជំរុញពាណិជ្ជកម្ម។ វេទិកានេះ គឺជាព្រឹត្តិការណ៍អមក្នុងពិធីសន្និបាតបូកសរុបលទ្ធផលការងារពាណិជ្ជកម្ម ឆ្នាំ២០២៥ និងទិសដៅការងារពាណិជ្ជកម្ម ឆ្នាំ២០២៦ ក្រោមអធិបតីភាព លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម ដែលរៀបចំឡើងរយៈពេលពីរថ្ងៃ គឺចាប់ពីថ្ងៃទី៨ ដល់ទី៩ ខែមករា ឆ្នាំ២០២៦ និងមានការអញ្ជើញចូលរួមពី ឯកឧត្តម លោកជំទាវ លោក លោកស្រី ជាថ្នាក់ដឹកនាំ ទីប្រឹក្សា មន្ត្រីរាជការ និងជំនួយការរបស់ក្រសួងពាណិជ្ជកម្មជាច្រើនដោយផ្ទាល់ និងតាមប្រព័ន្ធវីដេអូ ផងដែរ៕
News(ភ្នំពេញ)៖ នាព្រឹកថ្ងៃព្រហស្បតិ៍ ទី៨ ខែមករា ឆ្នាំ២០២៦ នៅទីស្តីការក្រសួងពាណិជ្ជកម្ម ក្នុងរបៀបវារៈទី២ ក្នុងព្រឹកថ្ងៃទី១ នៃពិធីសន្និបាតបូកសរុបលទ្ធផលការងារពាណិជ្ជកម្ម ឆ្នាំ២០២៥ និងទិសដៅការងារពាណិជ្ជកម្ម ឆ្នាំ២០២៦ របស់ក្រសួងពាណិជ្ជកម្ម គឺជាវេទិកាពិភាក្សាលើប្រធានបទ៖ យុទ្ធសាស្ត្រពង្រឹង និងពង្រីកពាណិជ្ជកម្មក្នុងប្រទេស ដែលសម្របសម្រួលដោយ ឯកឧត្តម រាជ រ៉ា រដ្ឋលេខាធិការក្រសួងពាណិជ្ជកម្ម និងចូលរួមធ្វើបទបង្ហាញ បកស្រាយ ព្រមទាំងចែករំលែកពីបទពិសោធន៍ដោយផ្ទាល់ពីថ្នាក់ដឹកនាំក្រសួងពាណិជ្ជកម្ម ដែលមានបទពិសោធន៍អនុវត្តការងារជាក់ស្ដែងទៅលើប្រធានបទសំខាន់ៗ រួមមាន៖ ១. ការធ្វើពិពិធកម្មទីផ្សារនិងផលិតផលសម្រាប់បំពេញតម្រូវការ និងយន្តការតភ្ជាប់ទីផ្សារទៅនឹងផលិតកម្ម បកស្រាយដោយ ឯកឧត្តម អេង សុធីវ័ន្ត អគ្គនាយកនៃអគ្គនាយកដ្ឋានពាណិជ្ជកម្មក្នុងប្រទេស ២. ការធានាស្ថិរភាពថ្លៃទំនិញ និងការធ្វើអន្តរាគមន៍ទីផ្សារ បងស្រាយដោយ ឯកឧត្តម ចាន់ សុខទី ប្រតិភូរាជរដ្ឋាភិបាលកម្ពុជាទទួលបន្ទុកជាប្រធានអគ្គនាយកក្រុមហ៊ុនហ្គ្រីនត្រេដ ៣. ការសម្របសម្រួលបង្កើតទីផ្សារលក់ដុំ ដើម្បីធានាការចែកចាយ និងផ្គត់ផ្គង់ផលិតផលសម្រាប់ទីផ្សារក្នុងប្រទេស បកស្រាយដោយ ឯកឧត្តម ស៊ាង ថៃ រដ្ឋលេខាធិការក្រសួងពាណិជ្ជកម្ម ៤. ការជំរុញបង្កើតម៉ាកសញ្ញាផលិតផលខ្មែរ និងម៉ាកវិញ្ញត្តកម្ម បកស្រាយដោយ ឯកឧត្តម អ៊ុក ប្រជា រដ្ឋលេខាធិការក្រសួងពាណិជ្ជកម្ម ៥. ការឃ្លាំពិនិត្យទីផ្សារដើម្បីធានាសុវត្ថិភាព និងសុខុមាលភាពអ្នកប្រើប្រាស់ បកស្រាយដោយ ឯកឧត្តម គឹម មាសសុខសីហា អគ្គនាយក ក.ប.ប.៕